نوم ( حديث الكوستر) حديث ساخر

تنبيه هام جدا ( حديث الكوستر هو نقل لهموم الناس واحاديثهم في سيارة الكوستر والكيا و المقهى و في البيت والمستشفى واماكن العمل وحتى فوق القمر !! ، بمعنى هو حوار من صميم وضمير الشعب ، لذلك لاتوجد ضرورة لقيام البعض بالتهجم والتقليل من شأن هذا الحديث ، لأنة وبصراحة متناهية هو حديث الشعب العراقي وهذه هي الحقيقة ، لذلك يجب علينا ان لا نتجاهل هذه الحقيقة) مع تحيات سائق الكوستر فرحان الغضبان
وبدأ حديث الكوستر مع صوت فرحان الغضبان مخاطبا العبرية ( عمي شو الكل نايم ويشوخر ما دكلولي شنهي السالفة) وأضاف فرحان الغضبان ( يابه هي كوستر مال نقل عبرية قابل هي فندق ) ، فرد عليه احد العبرية بالقول (عيوني فرحان الناس نايمه بالكوستر لانه ما تنام ببيوتها من الحر ) ، فرد عليه فرحان الغضبان ( يابه صح ما ينامون وصح كهرباء ماكو والله يساعد الناس ، بس ما يصير واحد ينام بالكوستر ، لازم الواحد يراعي مشاعر الاخرين ) ، وتكلمت امرأة من العبرية وقالت ( خاله فرحان والله كلامك صحيح ، بس عندي ملاحظة وهي لعد ليش هم ما يراعون مشاعر الناس ، وليش ما يراعون مشاعر الاطفال والعجايز والشياب ، ليش كاطعين الكهرباء علينه ، من يكون الله لا يوفقهم لادنيا ولا اخره ، ليش يمه ليش أريد واحد يكلي شنو ذنب هذا الشعب ) ، فقاطعها فرحان الغضبان بالقول ( حجية هذا شنو الكلام ، المهم هم عدهم كهرباء وعدهم بيوت مريحة وسيارات حديثة وفلوس حتى يفكرون صح ويخططون صح وينفذون صح كل الخطط على هذا الشعب المسكين ) ، فقالت لم المرأة ( يعني شنو يخططون وينفذون ، يمه فرحان هم كل تخطيط ما عدهم ،هم ينفذون ما يخطط لهم غصبا عليهم وعلى ابو ابوهم وو ) ، لكن فرحان الغضبان يرد عليها بالقول ( يابه كافي هذا الحجي شنو  حجية رجاء اسكتي ) وانتهت حلقة اليوم بعد ان ردد فرحان الغضبان مع نفسه ( والله ياحجية كلامك صحيح وصدك هم عبارة عن ادوات تنفذ خطط الغير للاسف ،وما ادري أشوكت تصعد عدهم العراقية ويصحون على انفسهم لاجل أهلهم )